【靴Collection：Magista Obra FG 實測】
.
無得踢波嘅呢段時間，就等阿靴同大家回顧下一啲自己會儲落嚟嘅波Boot。响香港住，地方一定唔會點大，所以自己都只可以揀波Boot嚟儲。阿靴儲落嘅，一係就踢落感覺好正，一係就別具意義。今個星期，阿靴就先同大家講講一對自己非常喜歡嘅波Boot，Magista Obra FG，顏色更加係迷彩配色。Magista Obra 係2014 Nike嘅產物，記得當時係Nike首對Flyknit配以高筒嘅波Boot，而且設計非常創新同靚仔，可以話係當時有留意波Boot嘅波友，都會想擁有嘅一對。
.
Magista Obra當年定價不菲，高筒嘅波Boot亦令當時嘅波Boot售價推高至港紙2000以上嘅價錢。於當年新高嘅價錢，Magista Obra就用上當時一剔嘅Flyknit科技，一整塊地組成波Boot，並配以薄嘅塗層增強耐用度。高襪筒Dynamic Fit亦都係當時新嘗試嘅科技，當時一剔應用Dynamic Fit目的係增強足部移動嘅感覺，令大家感覺到人Boot合一嘅感覺，同時亦為大家帶來更強嘅Lockdown。 此外，Magista Obra亦都係無鞋舌波Boot嘅先驅，以襪套式設計取代，變得更貼腳，又唔驚鞋舌兩邊移位。鞋釘上Magista Obra主要以八粒短圓釘組成。當時Magista Obra嘅推出，係取代之前嘅CTR360，目的係為球場內嘅Playmarker打造一對高質素嘅波Boot。
.
呢對波Boot阿靴以前比賽時不時會著到，前一排未封場時，阿靴玩波都會不時會著落場，回顧翻個感覺。今次，同以往嘅實測一樣，阿靴都會同大家報告下Magista Obra嘅整體發揮。
.
阿靴最滿意嘅係Magista Obra嘅傳控質感，Magista Obra嘅Flyknit配以塗層，再加上內層薄薄嘅一層Pad，帶來非常滿意嘅控球質感，Magista Obra鞋面上嘅網狀紋理亦能夠加強控球球感，佢嘅紋理亦唔會太啜身，帶來到具球感嘅赤足體驗。至於傳送上面，Magista Obra雖然無袋鼠皮類型波Boot嘅傳統球感，不過佢嘅質感同樣令人深刻，短傳上質感屬於爽而且富力量感，同樣佢嘅鞋面凹凸紋理以及內層嘅薄Pad，提供到舒適球感，發揮相當理想，呢種質感同樣能夠於長傳上體驗得到，Magista Obra長傳食力而且球感充足。
.
盤扭上阿靴感到滿意，雖然Magista Obra定位唔係速度型，未必俾到一種非常貼腳又靈活嘅盤扭體驗，不過佢質料算薄，加上鞋面各層質料帶來優質嘅球感，盤扭時嘅觸球感覺係相當唔錯。此外，Magista Obra鞋釘用上短圓釘，縱然佢未能帶來強勁嘅爆發力，不過於仿真草場上就變得更合適，帶來相當平衡嘅盤扭體驗，相當合適中路球員於中場位置持球轉身及作傳送。
.
射門上Magista Obra發揮也相當不錯，較薄嘅鞋面配以特有嘅紋理令射門變得食力，同時亦可以帶來理想嘅球感，阿靴認為Magista Obra可以較輕鬆做到一啲無迴旋嘅射門。此外，Magista Obra腳內檔射門也屬於中上，雖然佢鞋面用料不算啜身，不過獨有嘅凹凸紋帶來適中嘅摩擦力，腳內檔射門富弧度而且富力量感。
.
Magista Obra亦有唔好嘅地方，畢竟佢鞋面用上Flyknit加上較薄嘅塗層，整體保護性會變得較弱。此外，阿靴唔係高襪筒嘅愛好者，始終踢波靈活度高係較為緊要，仲記得當初第一次著有襪筒波Boot時，阿靴係用咗唔少時間適應。
.
至於尺碼上，Magista Obra係有偏細嘅狀況，阿靴認為選擇大半碼會較為合適。至於鞋型上，Magista Obra會適合中至闊腳嘅波友。
.
Nike Magista Obra FG 實測報告：
盤球：●●●●
控球：●●●●●
短傳：●●●●●
長傳：●●●●◐
射門：●●●●◐
舒適：●●●●
保護：●●●
.
--------------------------------------------------
【屎波裝備多Instagram】Follow: instagram.com/hkfootballreview
【波Boot實測】Adidas Top Sala Lux: https://youtu.be/R7Win_I5PQw
【波Boot實測】白飯魚: https://youtu.be/-dbvs0_YgiY
【波Boot比較】五對驚喜釘Boot: https://youtu.be/vzDRe25kkrM
Search